स्वर्गीय विश्वेश्वरप्रसाद कोइरालाको आज एक सयौं जन्म जयन्ती

Voice of Gulmi,नारायण प्रभात मरासिनी         प्रथम जननिर्वाचित प्रधानमन्त्री तथा नेपाली कांग्रेसका संस्थापक नेता स्वर्गीय विश्वेश्वरप्रसाद कोइरालाको आज एक सयौं जन्म जयन्ती देशभर विभिन्न कार्यक्रम गरी मनाएका छन् । एक सय वर्ष अगाडि आजैका दिन जन्मनु भएका कोइराला नेपाली प्रजातान्त्रिक आन्दोलनका कहिल्यै नओइलाउने नाम हुनुहुन्छ । विश्व समाजवादी आन्दोलनका अगुवासमेत रहनुभएका वीपी कोइरालाको समाजवादी विचारधारा नेपालका लागि सान्दर्भिक मानिन्छ । विक्रम सम्वत १९७१ साल भदौ २४ गते भारतको बनारसमा जन्मनु भएका कोइरालाको बि सं २०३९ साउन ६ गते निधन भएको थियो । नेपालका प्रथम जननिर्वाचित प्रधानमन्त्री कोइरालाले एकतन्त्रीय राणा शासन र पञ्चायत विरोधी आन्दोलनको नेतृत्व गर्नुभएको थियो । बिसं २०१७ साल पुस १ गते कोइराला प्रधानमन्त्रित्वको सरकारलाई अपदस्त गरी तत्कालीन राजा महेन्द्रले मलुकमा दलविहीन पञ्चायती व्यवस्था लागु गरेपछि वीपीले ८ वर्ष जेल जीवन बिताउनुभएको थियो । त्यसलगत्तै २०२५ सालमा भारत निर्वासनमा जानुभएका वीपी विदेशीका कारण नेपालको आन्तरिक राष्ट्रियतामा आघात पुगेको निष्कर्र्षसहित राष्ट्रिय मेलमिलापको नीति लिएर बिसं २०३३ सालमा नेपाल फर्किनु भएको थियो । नेपाली प्रजातान्त्रिक आन्दोलन र नेपाली साहित्यमा विशिष्ट योगदान पु¥याउनुभएका नेपालका प्रथम जननिर्वाचित प्रधानमन्त्री विश्वेश्वरप्रसाद कोइरालाको घाँटीको क्यान्सरका कारण निधन भएको थियो । आफ्नो आस्था, आदर्श, सिद्धान्तबाट कहिल्यै पछि नहट्ने एक महान् राष्ट्रवादी चिन्तक स्वर्गीय कोइराला नेपाली राजनीतिमा मात्र नभई साहित्यका फाँटमा पनि त्यतिकै चर्चित हुनुहुन्छ । कोइरालाका आत्मकथा, जेल जीवन, दोषी चस्मा, यहुदी र हिटलर, सुम्निमा, मोदीआइन, स्वेत भैरवी, तीन घुम्ती, नरेन्द्र दाईलगायतका थुप्रै बहुचर्चित कृति प्रकाशित छन् । नेपाली कांग्रेस गुल्मीले पनि एक कार्यक्रमका विच सयौँ विपी जयन्ति मनाएको छ । आजको राजनीतिक अवस्था र विपी विषयक अन्तरकृयात्मक कार्यक्रमको आयोजना गरेर पार्टीले सयौँ विपी जयन्ति मनाएको हो । कार्यक्रममा बोल्ने बक्ताहरुले नेपाली राजनीतिमा विश्वेश्वरप्रसाद कोईरालाले पु¥याएको योगदानको बारेमा चर्चा गरेका थिए । साथै उनीहरुले बर्तमान राजनीतिमा उहाँको अभाव खड्कीएको समेत बताएका थिए । कार्यक्रममा मन्तब्य राख्दै नेपाली कांग्रेसका नेता प्रेमनाथ अर्यालले प्रजातान्त्रीक समाजबादका प्रणेता कोईरालाको विचार बर्तमान समयमा पनि उत्तिकै सान्दर्भिक रहेको बताउनुभयो । खासगरी अहिलेको संक्रमणकालीन अवस्थामा उग्र बामपन्थी र दक्षिणपन्थी समुहरुले विपीको विचारमा प्रहारको गरेको उहाँले आरोप समेत लगाउनुभयो । त्यसैले अहिले नेपाली कांग्रेसले अहिलेको समयलाई चिन्दै विपीले अंगिकार गरेको विचारलाई अझ शशक्त माध्यमबाट जनतामा पु¥याउनुपर्ने उहाँको जोड छ । त्यस्तै नेपाली कांग्रेस गुल्मीका सचिव विष्णुप्रसाद बलालले नेपालको प्रजातन्त्रको लागि संसारमै प्रजातन्त्रको महत्वपूर्ण विचार राख्ने कोईरालाको विच अहिलेको समयमा एकदमै सान्दर्भिक भएको बताउनुभयो । कोईराला एउटा युगान्तकारी ब्यक्ति भएकै कारण नेपालबाट हुकुमी शाशन र शोषणको अन्त्य भएको स्पष्ट पार्नुभयो । साथै कोईरालाले नेपालमा प्रजातान्त्रिक सुरुवात गरेकोले उहाँको नाम ईतिहासमा स्वर्णिम अक्षरमा लेखिने बलालको भनाई रहेको छ । सचिव बलालको सभापतित्वमा सम्पन्न भएको कार्यक्रममा महिलासंघ सभापति विष्णुकुमारी सापकोटा, तम्घास गाउँ समिति सभापति अखिलेश्वर प्रसाद पाण्डे, नेपाल विद्यार्थी संघका उपसभापति निरोज मरासीनी लगायतले पनि विपीको सिद्धान्त, राष्ट्रप्रति उहाँको भुमिका र आजको राजनीति अवस्थामा उहाँले प्रतिपादन गर्नुभएको पार्टीको सिद्धान्तको महत्वका विषयमा धारणा राख्नुभएको थियो । कार्यक्रम तम्घास गाउँ समितिका उप सभापति रुद्र पाण्डेको संचालनमा सम्पन्न भएको थियो ।