,नवलपरासीको अर्खलामा जिप दुर्घटना दुई जनाको मृत्यु

Voice of Gulmi,चैत्र ११ नवलपरासी नवलपरासीको पहाडी राजमार्ग अन्तर्गत बुलिङटार दलदले सडकखण्डको अर्खलामा  भएको जिप दुर्घटनामा दुई जनाको मृत्यु भएको छ भने आठ जना घाइते भएका छन् । बुलिङटारबाट दलदलेका लागि आउँदै गरेको ना१ज २०७७ नम्बरको जिप अर्खला भिरबाट २०० मिटर तल खसेको हो । बुलिङटार बस्ने ३६ वर्षीया निमकुमारी सूर्यवंशी र डाडाँझेरी– ९ बस्ने ३७ वर्षीय जिप चालक दीपेन्द्र फालको मृत्यु भएको इलाका प्रहरी कार्यालय कावासोतीका प्रहरी निरीक्षक मोहन अधिकारीले जानकारी दिए । दुर्घटनामा आठ जना घाइते भएका छन् भने घाइतेमध्ये किरण रानाभाटको अवस्था चिन्ताजनक रहेको बताइएको छ । घटनास्थल विकट पहाडी गाविस भएकाले घटनाका बारेमा ढिला थाहा भएको बताइएको छ । बुलिङटार प्रहरी चौकी र रुद्रपुर प्रहरी चौकीको टोलीले घाइतेको उद्धार गरी उपचारका लागि कावासोतीतर्फ ल्याउँदै गरेको कावासोती प्रहरीले जनाएको छ ।