बसको ठक्करबाट मोटरसाइकलमा सवार २ जनाको मृत्यु

Voice of Gulmi,माघ २७ ।- कपिलवस्तुमा बसको ठक्करबाट मोटरसाइकलमा सवार २ जनाको घटनास्थलमै ज्यान गएको छ । बुटवलबाट कृष्णनगरतर्फ जाँदै गरेको लु १ ख ४७०३ नम्बरको यात्रुबाहक बसले विपरीत दिशातर्फ गइरहेको लु १३ प ५७६३ नम्बरको पल्सर मोटरसाइकललाई पूर्वपश्चिम राजमार्ग अन्तर्गत चनई ५ खरेन्द्रपुर स्थित छाला फैक्ट्री नजिकै हिजो ठक्कर दिएको हो । ज्यान जानेमा चनई ७, कटुवाका २८ वर्षीय अब्दुल वफा र कृष्णनगर बस्ने २६ वर्षीय उमर अन्सारी रहेका प्रहरीले जनाएको छ । हिजो अपरान्न ४ बजे दुर्घटना भएपछि आक्रोसित पीडित पक्षले त्यसक्षेत्रमा अबेरसम्म यातायात अबरुद्ध पारेका थिए । पीडित पक्षले बसचालकको लापरबाहीले आफन्त गुमाउनु परेको आरोप लगाउँदै कडाभन्दा कडा कारबाहीको माग गर्दै अबेरसम्म पनि शव उठाएका थिएनन् । घटनापछि बस र चालकलाई प्रहरीले नियन्त्रण लिई कारवाही प्रक्रिया अघि बढाइएको वडा प्रहरी कार्यालय चन्द्रौटाका प्रहरी नायब निरीक्षक महाशर्मा पाण्डेले बताउनुभएको छ ।