आज फागुन ७ प्रजातन्त्र दिवस

Voice of Gulmi,फागुन ७ – आज ६४ औं राष्ट्रिय प्रजातन्त्र दिवस बिभिन्न कार्यक्रम गरी मनाइ‌दैछ ।

२००७ सालको प्रजातान्त्रिक आन्दोलनको फलस्वरुप जहानियाँ राणा शासनको अन्त्य भै मुलुकमा प्रजातान्त्रिक व्यवस्था शुरु भएको सम्झनामा हरेक वर्ष फागुन ७ गते प्रजातन्त्र दिवस मनाइने गरिन्छ ।

मुलुकमा लोकतन्त्र स्थापना भएपछि भने प्रजातन्त्र दिवसको माहोल पहिजेजस्तो छैन । प्रजातन्त्र दिवसको अवसरमा शुभकामना व्यक्त गर्दै राष्ट्रपति डा. रामवरण यादवले आजको दिनलाई विशेष महत्वको रुपमा लिनुपर्ने उल्लेख गर्नुभएको छ । राष्ट्रपति यादवले दलहरुको प्रतिबद्धता अनुसार समयमै संविधान बन्ने विश्वास पनि व्यक्त गर्नुभएको छ ।

प्रधानमन्त्री सुशील कोइरालाले पनि प्रजातन्त्र दिवसको अवसरमा शुभकामना सन्देश दिँदै एकतन्त्रीय राणा शासनबाट नागरिकलाई मुक्त गरी मुलुकमा प्रजातन्त्रको स्थापना भएको ऐतिहासिक दिनको रुपमा स्मरण गर्नुभएको छ ।

प्रजातन्त्र दिवसले सबै नेपालीलाई पटकपटकको संघर्ष र बलिदानबाट प्राप्त लोकतन्त्र, गणतन्त्र र संघीयता सहितको शासन पद्धतिका साथै देश र नागरिकको हितलाई केन्द्रमा राखी अगाडि बढ्नको लागि प्रेरणा दिने विश्वास व्यक्त गर्नुभएको छ ।