नेपाली कांग्रेसका सभापति सुशील कोइराला प्रधानमन्त्रीमा निर्वाचित भए

Voice of Gulmi,

२७ माघ २०७० काठमाडौं । नेपाली कांग्रेसका सभापति सुशील कोइराला प्रधानमन्त्रीमा निर्वाचित भएका छन् । निर्वाचितसँगै कोइराला नेपालको ३७ औं प्रधनमन्त्री भए । उनी दोस्रो अविवाहित प्रधानमन्त्री पनि भएका हुन् ।-कोइरालाको पक्षमा ४०५ र विपक्षमा १४८ मत खसेको थियो । दोस्रो अविवाहित र खानदानी चौथो प्रधानमन्त्री यसअघि कृष्णप्रसाद भट्टराई अविवाहित बनेका थिए । संविधानसभामा दुई ठूला दल कांग्रेस र एमालेको सहमतिअनुसार आज व्यवस्थापिका संसदले कोइरालालाई प्रधानमन्त्रीमा निर्वाचित भएका हुन् । ७८ बर्षीय कोइराला ५० वर्षे राजनीतिमा पहिलो पटक लाभको पद लिँदै कोइराला परिवारबाट प्रधानमन्त्री बन्नेमा चौथो हुन् । यसअघि कोइराला परिवारबाट विपी कोइराला, मातृकाप्रसाद कोइराला र गिरिजाप्रसाद कोइराला प्रधानमन्त्री बनेका थिए । २००७ सालको आन्दोलन देखि नै राजनीतिमा सक्रिय सुशील कोइराला २०३४ सालमा आएर कांग्रेसको केन्द्रीय सदस्यमा बनेका थिए । उनी गिरिजाप्रसाद कोइरालाको निधनपछि पार्टीको १२ औं महाधिवेशनबाट सभापति बनेका हुन् । ६ वर्ष जेल र २० वर्ष भारत प्रवासमा जीवन बिताएका कोइराला नेपालमा लोकतन्त्र बहालीका लागि कांग्रेसको सशस्त्र क्रान्तिमा गिरिजाप्रसाद कोइरालाको सहयोगीका रुपमा रहेका थिए । उनले पछिल्लो संविधानसभाको निर्वाचनमा बाँके ३ र चितवन ४ गरी दुई स्थानबाट चुनाव जित्दै पार्टीमा झन् शक्तिशाली बनेका हुन् । अघिल्लो संविधानसभा निर्वाचनमा कोइराला बाँके ३ बाट हार्न पुगेका थिए । यसपटक वरिष्ठ नेता शेरबहादुर देउवालाई हराउँदै कोइराला संसदीय दलको नेता भएका हुन् । त्यससँगै संसदीय नेता नै प्रधानमन्त्री बन्ने कांग्रेस प्रावधान अनुसार उनलाई प्रधानमन्त्री बन्ने ढोका पूर्ण रुपमा खुलेको थियो । २०४६ को प्रजातन्त्र पुनस्र्थापना भएपछि गठित पहिलो सरकारमा परराष्ट्रमन्त्री त्यसपछि उपप्रधानमन्त्री बन्न गरिएको आग्रह अस्वीकार गर्दै पदको लोभ नगर्ने नेताको रुपमा छवि बनाएका थिए । कोइरालाले २०४८ र २०५६ मा बाँके क्षेत्र नं. २ बाट सांसदमा विजयी भएका थिए ।