गाउँकी अति विपन्न र असाहय बृद्धा आएर ५ हजार २ सय रुपैयाँ चन्दा दिएपछि

Voice of Gulmi, माघ १९, २० र २१ गते तिन दिनसम्म स्वर्ण महोत्सव मनाएको घोर्ले माध्यामिक विद्यालय दुविचौरमा आज एक्कासी गाउँकी अति विपन्न र असाहय बृद्धा आएर चन्दा दिएपछि त्यस विद्यालय परिवार चकित परेको छ । दुविचौर १ उर्लेनी पियानीडाँडाकी विपन्न र असहाय ८७ वर्षिया बृद्धा सुन्तली बिश्वकर्माले आज विद्यालयमै आएर ५ हजार २ सय रुपैयाँ चन्दा दिएपछि विद्यालय परिवार चकित परेको हो । बृद्धा सुन्तलीको भत्किएको सानो झुपडी छ । विहान खाए बेलुका के खाउँ भन्न अवस्था छ । उहाँको श्रीमानको मृत्यु भएको एक दशक भैसकेको छ । उहाँका छोरा छोरी पनि छैनन् । विद्यालयका प्रधानध्यापक विष्णुराज गिरीले असाहाय तथा विपन्न बृद्धा विश्वकर्माले विद्यालयमै आएर ५२ सय रुपैयाँ पटुकीबाट निकालेर चन्दा दिदा ५१ करोड दिए जस्तो लागेको बताउनुभयो । त्यस्ती दयाकी पात्रले चन्दा दिदा आफ्नो आखाबाट आँसु रसाएको उहाँले बताउनुभयो। त्यस्तै विद्यालय व्यवस्थापन समितिका अध्यक्ष हुमबहादुर बस्नेतले विद्यालयलाई चन्दा पैसावालाले मात्रै दिन्छन भन्ने मानसिकता उहाँले तोड्नु भएको बताउनुभयो । एक महिनासम्म प्रत्येकका घरमा चन्दा माग्न जाँदा पैसावालाहरुको नमिठो बचन पनि सहनु परेको दुखेसो पोख्दै वस्नेतले यस्ती विपन्न बद्धाले विद्यालयमै आएर चन्दा दिदा त्यस्ता पुँजीपतिहरुलाई चुनौति थपिएको महशुस गरेको बताउनुभयो । बृद्धा सुन्तलीले आफुले कतै टाढा तिर्थ गर्न नगएको र कुनै ठुलो यज्ञ–जग्गे लगाउन नसकेकोले पुण्य कमाउन स्कुललाई सहयोग गरेको बताउनुभयो । उहाँले दान भन्ने कुरा धन भएकाले होईन मन भएकाले दिन्छन् भन्ने खवर जाओस भन्ने कामना गर्नुभयो । घोर्ले माध्यामिक विद्यालयले उहाँलाई आज एक कार्यक्रमको आयोजना गरी सम्मान समेत गरेको छ । विद्यालय ब्यबस्थापन समित अध्यक्ष हुमबहादुर वस्नेतको अध्यक्षता, शिक्षक खुमबहादुर खत्रीको स्वागत मन्तब्य र प्रधानध्यापक विष्णुराज गिरीको सञ्चालनमा कार्यक्रम सम्पन्न भएको थियो